Taringot tu Malauraja: Tabu Tabu Gumbang

Taringot tu Malauraja.

a) Malau

Mangihuthon pandok ni deba halak, ia Malauraja di Limbong do maringanan, jala disi do tubu angka anakna. Sian i pe muse marserak pinomparna tu angka luat na niinganan nasida nuaeng.

Pinompar ni anakna na margoar Lamberaja do deba na laos tinggal di Limbong, i ma angka marga Malau na disi nuaeng.

langgo mangihuthon pandok ni na deba, songon on do: Dung marsagi angka anak ni Guru Tateabulan taringot tu tano siinganannasida be, laho ma Malauraja maringanan tu Tulas.

Sian i laho muse ma ibana dompak Pangururan laos mangoli ibana disi, i ma iboto ni Tuan Nahodaraja marga Simbolon.

Munsat do ibana muse sian i dompak Simanindo jala maringanan paiparipar dohot pulo Malau. Marharoroan sian goarna do umbahen margoar "pulo Malau" pulo i.

Bungkas do muse ibana tu pasir ni Simalungun. Ja dung manang sadia leleng ibana disi, mangoli ma ibana, boru ni ompu ni marga Siboro, jala tubu ma anakna tolu, i ma:

1) Gurning (Manik),

2) Ambaritaraja dohot

3) Lamberaja.

Digora deba muse ma na tama di niolina parjolo i. Dung hu di bulanna gok di taonna, tubu ma na di bortian, baoa.

Ia bagot ni ina ni posoposo i bangalon do, ala ni i didok Malauraja ma: "Aha do buatonku panganonmu, ale boru ni datulang, mangarus bagotmi?"

"Tuak ma lului inumonku manarus," ninna niolina i. la dung songon i pandok ni niolina i, laho ma Malauraja manaek bagot naung martaguk. Dung ro di ginjang ibana, matos ma tali sidegedegeanna, madabu ma ibana.

Tarbege do parbabas ni pardabu ni Malauraja tu

niolina i, ala ni i pintor hehe ma ibana mandapothon; diida ma nunga peak jala mate. Manganggoek ma niolina i jala mangandungi.

Ia dung mate Malauraja, mabiar ma na niolina i atik beha dibunu tubu ni imbangna anak na tinubuhonna i.

Mangihuthon baritana, dibuat ma sada tabutabu na bolon margoar "tabutabugumbang." Dibahen ma posoposo i tu bagasanna, jala dipamasuk ma dohot purapura na marisi susu ansopon ni

posoposo i; dibahen ma dohot pungga-haomasan, tintin sibaganding pustaha dohot mas; i ma angka barang na jinalona hian sian amana.

Dibahen ma dohot sada surat. Ia hata ni surat i songon on do: "Maup ma ho maup di malpung, ia sampe ho sampe di toras; sahat ma ho tu huta ni tulangmu Tuan Nahodaraja na maringanan di Pangururan: parsirangan ni aek pardomuan ni tano, lambung ni tano siogung- ogung." la tabutabu i didamari do sian duru unang masuk aek tu bagasan.

Dung i diboan ma tu topi ni tao, laos diumbangkon ma disi, jala ditonggohon ma tu Debata dchot tu baru Saniangnaga asa horasanna posoposo i jala tulus maup tabutabugumbang i tu tano Pangururan. Jadi ro ma alogo magombushon tabutabu i jala sahat ma i tu Hirta Jonok tu Pangururan.

Di manogot ni ari hasasahat ni tebutabugumbang i, tongon do di tingki laho marburu Tuan Nahodaraja rap dohot Raja Sitempang marga Sitanggang, jala mamolus do nasida sian Hirta i; gabe dda

nasida ma mumbangumbang tabutabu i.

Dung i didok Tuan Nahodaraja ma tu Raja Sitempang:

"Buat ma di ho tabutabu i Raja Sitempang, sai adong do ulaon ni i bahenonmu!"

"A, songon na sumar balga ni i, atik tung beha adong aji ni halak disi," ninna Raja Sitempang.

"Buat ma nian, ndang pola adong aji disi," ninna Tuan Nahodaraja. Tuan

"Beha ia tung adong uli ?"

"Holan di ho pe taho," ninna Tuan Nahodaraja.

Jadi dibuat Raja Sitempang ma tabutabu i jala ditaruhon ma tu huta dipeakkon ma tu pantar jolojolo.

la posoposo i, si Tabutabugumbang do goarna dibahen, mangihuthon goar ni ingananna i.

Asa songon on ma partording ni partubu ni pinompar ni anak ni Malauraja.