Home / Dinas Luar

Contoh Maragenda Kebaktian Minggu Sexagesima Contoh Acara Kebaktian Minggu

David Sigalingging, S.Pd Post a Comment
ACARA KEBAKTIAN
MINGGU SEXAGGESIMA
12 FEBRUARI 2023
HKBP LOBAM
01. PELEAN GERAKAN LIMA RIBU

02. Marende BE. No. 18; 1 - 3
1.Ungkap bahal na umuli, bagas ni Debatangki
Ai tusi do au naeng muli, ganup jumpang Minggu i
Hulului do disi, bohi ni Debatangki

2.Nunga ro au, o Tuhanku, ro ma Ho tu au muse
Ai di bagas ingananMu, las ni roha do sude
Sai bongoti rohangkon, baen ma JoroMi dison

3.Sai pantun pangalahongku maradophon bohiMi
Sai suruhon tu rohangku Tondi Parbadia i
Asa sai tongtong ture tangianghu ende pe

03. VOTUM A.V/B – D.V/18
A: Angka ayat sidohonon di ari minggu dohot diari pesta
V: Tingki panaonon ni Tuhan Jesus (Septuagesima – Estomihi)
D: Angka tangiang laho mamungka di anga ari pesta
V: Tingki panaonon ni Tuhan Jesus

Paragenda (Invocatio): Marhitehite Goar ni Debata; Ama, AnakNa Tuhan Jesus Kristus dohot Tondi Porbadia, na manompa langit dohot tano on. Amen!

A.V/B: Sai paeleng ma pinggolIMu tu ahu, hapogani paluahon ahu. Sai Ho ma gabe dolok batu partanobatoan di ahu, gabe huta na gonting laho pangoluhon ahu. Ai Ho do partanobatoanku hian dohot pangondinganku, jala ala ni GoarMu sai iringiringonMu jala toguonmu ahu. Tu Ho do, ale Jahowa, ahu marhaposan, sai unang ma paurak ahu saleleng ni lelengna; sai palua ma ahu marhitehite hatigoranMu! (Psalm 31, 3, 4. 2). Haleluya!

Huria Mangendehon: Mangendehon: Haleluya, haleluya, haleluya!

D.V/18: Martangiang mahita: Ale Tuhan Debata, Ama ni saluhut parasinirohaon! Nunga ditatap Ho hami bangsoM on, ai ndang manjua Ho mangalehon AnakMu na sasada, Tuhan Jesus Kristus tu tangan ni pardosa, asa taononNa haleaon dohot siak ni bagi sahat ro di hau na pinarsilang. Sai tumpahi hami marhitehite asi ni rohaM, asa margogo hami jala marbenget ni roha songon anak haholongan ni rohaMi di angka sitaonon, asa marsangap GoarMu dohot AnakMu, Tuhan Jesus Kristus, dohot Tondi Parbadia marhitehite hami. Amen.

04. MARENDE BE. No. 467 :1+4
1. Asi ni rohaM hupuji ala Ho manobus au.
Dipaias Ho rohangku, gabe soranganMu au.
IngananMu rohanami, TondiMi manggohi i.
Pangke dohot ngolunami gabe ulaulaMi.

4. Sai papulik rohanami gabe pangoloi di Ho
Asa marsahala hami lao manghatindangkon Ho
IngananMu rohanami, TondiMi manggohi i.
Pangke dohot ngolunami gabe ulaulaMi.

05. PATIK
Paragenda: Tatangihon ma patik ni Debata, Sian 3 Musa 19 : 37 “Dibahen i radoti hamu ma saluhut parentangku dohot uhumhu, jala ulahon hamu angka i; ai Ahu do Jahowa.”

Paragenda:
Antong rap mangido Gogo ma Hita Sian Tuhan Debata laho mangulahon patik na i.

Huria mandok:
Ale Tuhan Debata! Sai pargogoi ma hami mangulahon na hombar tu PatikMi. Amen

06. MARENDE BE. NO. 180 : 1 + 2
1. Ro tu Jesus ho na loja Na maheu i
Lam lumbang do di lambungNa Rohami

2. Bereng di hau pinarsilang Daon ni sahitmi
Tuhanmi na hona uhum Singkatmi

07. MANOPOTI DOSA (B.10 – C.15)
B: Tangiang panopoton ni Dosa
C: Angka bagabaga, dung salpu tangiang manopoti dosa

Paragenda:
Tu adopan ni Debata, ta paunduk jala ta paserep ma rohanta, Tatopoti ma dosanta!

B.10: Ale Tuhan Debata, Pargogo na so hatudosan jala Ama Parasiroha! Ndang lomo rohaM mida hamatean ni pardosa; mulak ma nian parjahat i tumadingkon dalanna, asa mangolu ibana, i do dipangido rohaM. Ala ni i umbahen dipangido hami; sai sundati ma torutoruM asa unang mangonai be tu hami. Sai sesa sude dosanami, asa mangolu hami di bagasan asi ni rohaM. Sai pargogoi ma hami, asa margogo hami, marhitehite Tuhan Jesus Kristus Tuhanami. Amen.

Musik:
dialunkan dengan pelan dan Sayu..

Paragenda:
Ale Amanami na di banua ginjang, Parasi roha mida halak na dangol! Na ro do hami pardosa tu joloM, manopoti dosanami na godang i. Na tarsolsol bagi do hami nuaeng, ala jotjot hubahen hami sogo ni rohaM. Tama situtu do hona uhum hami ala ni i! Tung lambas ni rohaM sambing do umbahen so mago hami. On pe asi ma rohaM di hami, sai unang uhumi hami; sai sesa ma dosanami sudena, ala naung use mudar ni Anak haholongan ni rohaM di dolok Golgata. Amen.

Paragenda:
Bagabaga ni Debata taringot tu hasesaan ni dosa. Songon on do hata ni Jahowa.

C.15: Humophop hita, gabe dosa do Ibana na so tumanda dosa dibahen Debata, asa gabe hatigoran ni Debata hita, marhitehite Ibana. (2 Kor. 5: 21). Hasangapon ma di Debata na di ginjang! Amen.

08. MARENDE BE. NO. 177 : 1 + 3
1. Ndada tarhatahon hahoholong ni
Roha ni Tuhanta di pardosa i
Marsak do rohaNa mida jolma i
Na so olo unduk di hataNa i

3. Jesus do manaoni dosa ni sude
Nunga digarari do utangta be
Nunga pola mate Tuhan Jesus i
Paluahon hita sian dosa i

09. EPISTEL
Paragenda:
Tatangihon ma Hata ni Debata turpuk epistel di ari Minggu on na dienet sian 1 Korint 3 : 1 – 9 marganti soring ma Hita manjaha.
  1. Ahu pe, ale angka dongan, ndang tarbahen ahu mangkatai tu hamu uju i songon na tu angka partondi, sandok songon na tu angka pardaging do jala posoposo di bagasan Kristus.
  2. Susu do hupainumhon tu hamu, ndada sipanganon hian, ai ndang tarjalo hamu i uju i; gari nuaeng, gari so tarjalo hamu dope!
  3. Ai tong dope hamu pardaging. Ai anggo masa di hamu pangiburuon dohot parsalisian, nda pardaging hamu jala mamarangehon ruhut hajolmaon?
  4. Ai nda parroha hajolmaon hamu, molo adong na mandok: Sisean ni Paulus do ahu, jala na sada an: Sisean ni Apollos do anggo ahu?
  5. Ai ise Apollos; ise Paulus? Parhalado do nasida, parhiteanmuna gabe porsea, jala ganup hombar tu pangalehon ni Tuhan i di ibana.
  6. Ahu do manuan, Apollos do pabornokkon; alai Debata do patubuhon.
  7. Asa ndada rajuman na manuan manang na pabornokkon; Debata na patubuhon, i do!
  8. Dos do na manuan dohot na pabornokkonsa; alai ganup do manjalo upana, hombar tu pangulaonna be.
  9. Ai dongan pangula ni Debata do hami; hauma ni Debata, bagas ni Debata do anggo hamu.

Paragenda: Ido Hata na. Martua do Angka na tumangihon Hata ni Debata, jala na naumpeopsa. Amen.

10. MARENDE BE. NO. 123 : 1 + 3
1. Ale dongan na saroha manjalahi dame i
Dompak Jesus tapasada holong ni rohanta i
Ai Ibana do ulunta hita do ruasNa i
Tuhan Jesus do gurunta hita siseanNa i

3. Sai pasada ale Tuhan angka na porsea i
Asa masihaholongan songon na pinatikMi
Di bagasan hasintongan i do pinangidoMi
Sai padomu angka dongan na tutu sinondangMi

11. MANGH. HAPORSEAON
Paragenda:
Tahatindanghon ma haporseaonta i, songon na hinatindanghon ni donganta sahaporseaon di sandok portibi on.

Rap ma hita mandok:

Ahu porsea di Debata Jahowa, i do Ama, Pargogo na so hatudosan na tumompa langit dohot tano.

Ahu porsea di Jesus Kristus, Anak ni Debata Jahowa, na sasada i; i ma na tinubuhon ni si Maria na gabegabean sian Tondi Parbadia andorang so habubuhan; i do Tuhanta na tumaon na bernit di panguhuman ni si Latus; na mate tarpajal do Ibana di hau pinarsilang, na tuat tu banua toru,dung ditanom, na mulak mangolu di ari patoluhon, na manaek tu surgo laho hundul tu siamun ni Debata Jahowa, AmaNa i, Pargogo na so hatudosan i, disi ma Ibana, paima mulak sogot tu tano on manguhumi halak na mangolu dohot na mate.

Ahu porsea di Tondi Parbadia, jala adong sada huria na badia, Huria hatopan ni halak Kristen angka na badia, dohot di hasesaan ni dosa, dohot di Hata i, na mandok Mulak mangolu do sogot daging ni halak naung mate, dohot di hangoluan na so ra suda. Amen

12. KOOR
Paragenda: Tabega ma koor: Ina Gloria

13. TINTING

Paragenda:
Tabega ma soara ni tinting

14. MARENDE BE. NO. 831 : 1 + ..... (Pelean Ia + Ib)
1. Tung jotjot au songon boru Samaria mangalap aek tu sumur i
Hape so boi sombu uasna, mulak ulak pe mangalap i
Tung tuani ma ro Jesus manjouhon "Au do aek hangoluan i
Pangido asa hulehon aek pasombu uasmi"
Ale Jesus aek hangoluan gohi dohot panginumanki
Asa sombu uas na di rohangki asa sonang gok dame tondingki

2. Tung torop do jolma i na tarlalap lao mangoloi dagingna i
Suda gogona mamingkiri holan ngolu sisatongkin i
Di ujung na pe ingkon sai tarhirim molo so tu Jesus i
Ai holan marhite Ibana, jumpang hita hangoluan i
Ale Jesus aek hangoluan gohi dohot panginumanki
Asa sombu uas na di rohangki asa sonang gok dame tondingki

3. Molo mauas tondimu ale dongan, hatop ma ro tu Jesus i
Ibana do aek hangoluan, sai tangihon ma hataNa i
Di Ibana dapot ho hasonangan, pasahat ma dirim tusi
Mardame ho jala martua, ro di salelenglelengna i
Ale Jesus aek hangoluan gohi dohot panginumanki
Asa sombu uas na di rohangki asa sonang gok dame tondingki

15. JAMITA

16. MARENDE BE. NO. 140 : 1 + .............. (Pelean II)
1. Girgir ma hamu manogu sude
Na hum na begu manjua dope
Di hata ni Jesus na sangap tongtong
SangkapNa patulus di portibi on

2. Ndang jadi hamu Mabiar ale
Sai pangke burju Gogom sasude
Nang hehe sibolis Mamolgak hamu
Sai tatap ma Jesus pargogo tutu

3. Radoti burju HataNa sude
Sai monang hamu BaenonNa muse
Ibana do Raja Na tong monang i
Torop pe aloNa sumurut do i

4. Asi ma rohaM Ale Debata
Pasaut ma hataM Tumpahi nama
Sude na niula Ni naposoMi
Sai baen ma martua Sude jolma pe

17. TANGIANG PELEAN

Paragenda: (Na marjamita)
a Tatangianghon ma peleanta, martangiang ma hita:
Ale Debata, Amanami na di banua ginjang, Ho do haroroan ni saluhut silehonlehon na denggam dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho.

Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni HuriaM dohot di portibi on. Buhai ma rohanami marhitehite T'ondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

Huria mangendehon:
Na sa na nilehon mi, Tondi ro di pamatangku
Hosa dohot Gogo Ki, rondisaluhut aryangku
Hu pasahat itu ho, na so ungsatonku do.

18. TANGIANG HATOPAN
Ale Amanami na di banua ginjang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami, songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

Endehononhon:
Ai Ho do nampuna harajaon dohot hagogoon ro di hasangapon saleleng ni lelengna. Amen

19. PASUPASU
Paragenda: 
Ta halo ma pasupasu Sian Tuhan ta Debata,
Dipasupasu jala diramoti Tuhan Debata ma ho ( hita )! Disondanghon Tuhan Debata ma bohiNa tu ho ( hita ) jala asi ma rohaNa mida ho ( hita )! Didompakhon Tuhan Debata ma bohiNa tu ho ( hita ) jala dipasaorhon ma dameNa tu tondim ( tondinta be ). Amen

Huria Mangendehon: Amen..Amen...Amen

Cara Maragenda Kebaktian Minggu diatas diambil pada minggu Sexagesima.

Post a Comment for "Contoh Maragenda Kebaktian Minggu Sexagesima Contoh Acara Kebaktian Minggu"